Ek is ‘n Ricoffy mens


Weet asseblief dat ek nie die mense wat die tipes koffies drink tipeer nie.  Maar mense volgens wat verskillende koffies vir my beteken, beskryf.  So as jy Jacobs drink – moenie dink ek sê jy is ‘n klatergoud mens nie.  Dit is nie my bedoeling nie.

Ek noem toe mos so eendag terloops dat ek Ricoffy drink.  Ai, toe moes ek hoor hoe plein en ordinêr ek is want mens moet die ware Jakob drink.
Ek is ‘n Ricoffy mens want soos Ricoffy is ek presies dit wat ek sê ek is.  Geen pretensie, of duur verpakking nie.  Nee, ek is net ek.  In die oggend, wanneer die smaakkliere nog nie optimaal funksioneer nie, moet jy my met die suiker saam vat.  Net sodat ek makliker kan afgaan.

Later deur die dag kan jy my sonder suiker vat, want dan is ek reg vir wat voorlê.  Jy kan baie van my drink.  Bekers en bekers, want ek gaan nie jou sak ruk nie.  Ek is oral beskikbaar.  Jy hoef nie na my te soek nie.  Ek is net …. daar.  “Convenient” soos die Engelse sal sê.

En dan kry jy die Jacobs mens.  En ek bedoel nou nie mense wat Jacobs drink nie, nee allermins.  Ek bedoel die mense wat my aan Jacobs laat dink.  “Klatergoud” mense.  Vol blink beloftes maar as jy die pakkie oopmaak, is dit maar net nog ‘n mens.

Maar hulle hou van aardse besittings.  Omring hulle met die duurste, mooiste en beste.  Nie dat dit verkeerd is nie.  Maar die dag dat dit al is waaroor hulle kan praat – dan is dit wanneer ek besef, dit is wanneer hulle nie wil hê dat jy moet ontdek, dat onder daardie pretensie en vertoon, skuil daar net nog ‘n mens nie.  ‘n Mens wat deur dieselfde dinge as jy gepla word.  “n Mens wat dieselfde drome en wense as jy het.  Net nog ‘n mens.

Van die Jacobs mens kan jy nie baie drink nie.  Want die mens is duur.  Duur om die vriendskap te onderhou.  Die gewone is nie goed genoeg nie.  Nee, jy moet uithaal en wys.  Jy moet luister en prys.  Die Jacobs mens is nie altyd beskikbaar nie.  Jy moet soek en ‘n afspraak maak.  Jy kan nie die mens so in die verbygaan drink nie.  Nee, jy moet sit en dit slukkie vir slukkie waardeer.

En dan kry jy die “no name brand” koffie mens.  Hulle sê dis dieselfde maar oooo wee!  Jy moet drie lepels koffie ingooi om die smaak van koffie te erken.  Dan moet jy ekstra melk ingooi om die donker ‘n bietjie te verbloem.  ‘n Mens wat net te veel moeite is om af te sluk.  Dit is die “no name brands”.  Hulle sê hulle is koffie, maar mens kan nie sommer so met die oogopslag agterkom wie en wat hulle werklik is nie.   Jy moet werk om daardie koffiesmaak uit hulle uit te kry.  Maar as jy die regte kombinasie ontdek het, dan kan jy ook ‘n lekker koppie koffie uit hulle uit kry.

Ja, ek is ‘n Ricoffy mens …

Advertisements

Los jou mening ...

Please log in using one of these methods to post your comment:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s