Skaakmat


Het gister ‘n skaak game op vuisboek verloor.  Ek is nie juis ‘n vreeslike speler nie.  Konsentrasie neem af so na die derde skuif.  Maar dit het my onwillekeurig laat dink daaraan dat die lewe presies soos ‘n skaakspel is.

Elke stuk het sy doel.  Van die klein pion tot die magtige koningin.  In my oë is die koning nie regtig magtig nie, want hy kan sulke klein treetjies gee en is grootliks afhanklik van al sy “onderdane” om hom te beskerm.  Die enigte groot tree wat hy kan gee, is as hy “compromise” met die kasteel.  Nee, hy is nie werklik ‘n vreeslike imposante figuur nie.  Baie soos ‘n paar leiers in ons land.  Groot naam en titel, maar geen trefkrag nie.  Skuifel, skuifel maar aan soos die winde waai.

Die koningin is vir my ‘n toonbeeld van die stil sterk mense wat ek ken.  Sonder groot ophef doen hulle wat hulle moet doen om te oorleef.  Hulle beweeg oral rond.  Geen vasgestelde paaie en voorskrifte nie.  Nee, hulle beur vorentoe, maar as hulle pad geblok word, verander hulle taktiek en vind sukses op ‘n ander roete.

Die perd.  Dis nou ‘n ander kalant.  Beweeg volgens streng reëls maar as jy nie kyk nie, spring hy bo-oor alles en almal om sy plekkie in die son te vind.  Maak nie saak of hy dit verdien of nie.  Hy sal dit gaps, come hell or high water.

Die biskop.  Dit is nou die mannetjie wat die skewe weë bewandel.  Ondersoek alles en behou die goeie.  Maar as jy hom nodig het, dan is hy daar.  Sonder vrae en verwyte.  En as hy klaar gehelp het, beweeg hy verder aan.  Onbewus van die groot dade wat hy gedoen het.

Die kasteel.  Die rots, die vesting.  Word baiekeer as vanselfsprekend aanvaar.  Word nie soveel waardeer soos die koningin nie, maar as daar ‘n klip in die pad is, rol hy dit sommer moeiteloos weg.

Die pion.  Wat kan mens sê?  Dit is eintlik die sterkstes.  Onwrikbaar, vreesloos en hulle kan die grootste van die grootstes to hul knieë dwing.  Hulle is bereid om op te offer, moeilike onbegane paaie skoonmaak sodat die res kan volg.  En soos in die werklike lewe, die ouens wat die meeste opdraende kry.

So, dit maak nie werklik saak watter stuk jy op die spelbord is nie, jy het ‘n doel.  En as jy nie oë oophou nie, wag daar ‘n ywerige ander stuk om jou van die bord te verwyder en jou plek in te neem.

Ja …. die lewe is ‘n skaakspel …

Onderwerpe:

Advertisements

2 comments on “Skaakmat

Los jou mening ...

Please log in using one of these methods to post your comment:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s